فراه پوهنتون کې د عامه ادارې او پالیسۍ پوهنځي د استادانو، اداري او خدماتي کارکوونکو د ستاینې او تقدیر غونډه ترسره شوه
د فراه پوهنتون عامه ادارې او پالیسۍ پوهنځي د ریاست په نوښت، د دغه پوهنځي د استادانو، اداري او خدماتي کارکوونکو د علمي، اداري او مسلکي خدمتونو د درناوي او قدردانۍ په موخه د ستاینې او تقدیر غونډه ترسره شوه. په یاده غونډه کې د فراه پوهنتون رئیس، علمي او محصلانو چارو مرستیال، د پوهنځیو رئیسانو، استادانو او اداري کارکوونکو ګډون کړی و.
غونډه د عامه ادارې او پالیسۍ پوهنځي د مرستیال، نوماند پوهنیار نجمالدین حمیدي، له لوري د قرآن کریم د څو مبارکو آیتونو په تلاوت سره پیل شوه.
وروسته د فراه پوهنتون رئیس مولوي سمیعالله حقاني د اسلام له نظره د قدر، درناوي او ستاینې پر ارزښت خبرې وکړې او څرګنده یې کړه چې د علم خاوندانو، استادانو او د ټولنې د خدمت کوونکو درناوی یو مهم اسلامي او اخلاقي ارزښت دی. نوموړي د ښو خدمتونو قدرداني د کارکوونکو د لا زیاتې هڅونې او د علمي او اداري چاپېریال د پیاوړتیا لپاره اغېزمنه وبلله.
ورپسې، د عامه ادارې او پالیسۍ پوهنځي رئیس پوهنمل حسیبالله ایازي د الله تعالی شکر ادا کړ چې پوهنځي ته یې ژمن، وړ او مسلکي استادان، اداري او خدماتي کارکوونکي په برخه کړي دي. نوموړي د پوهنتون له رهبرۍ څخه د دوامدار ملاتړ او همکاریو له امله مننه وکړه او د پوهنځي د استادانو او کارکوونکو علمي، ښوونیز، اداري او خدماتي فعالیتونه یې وستایل.
نوموړي د استادانو او کارکوونکو په کمېټو کې د اغېزمنې ونډې، د محصلانو د روزنې، ښوونیزو فعالیتونو او د اداري چارو د ښه ترسره کولو په برخه کې د هغوی هڅې د پوهنځي د علمي او اداري پرمختګ مهمه برخه وبلله او د دوی خدمتونه یې د قدردانۍ وړ وبلل.
په پای کې د استادانو، اداري او خدماتي کارکوونکو د ارزښتناکو خدمتونو د ستاینې په موخه ستاینلیکونه ووېشل شول او یاد کسان د پوهنځي د ریاست له لوري په رسمي ډول تقدیر شول.
او غونډه د خیر او برکت په دعا سره پای ته ورسېده.
