د فراه لوړو زده کړو مؤسسه د تضمين کيفيت او اعتبار ورکولو رياست لخوا وستايل شوه!
د لوړو زده کړو وزارت د تضمين کيفيت او اعتبار ورکولو رياست، د ياد وزارت د ناستو په عمومي تالار کې د يوې غونډې په ترڅ کې د فراه لوړو زده کړو مؤسسه چې د هېواد په کچه يې د کيفيت لوړونې لومړنۍ مرحلې څخه د اعتبار اخيستنې په برخه کې تر ټولو لوړې (۸۳.۳۹) نمرې لرلې وستايل شوه.
په دې ستاينغونډه کې د فراه لوړو زده کړو مؤسسې رئیس مولوي سميع الله حقاني، علمي او محصلانو چارو مرستیال پوهنمل عبدالبصير رحماني او د کيفيت لوړونې آمر پوهنيار حامد طيب ګدون درلود.
په همدې مناسبت غونډه کې د لوړو زدهکړو وزارت علمي معین شیخ ضیاءالرحمن اریوبي وویل چې موږ باید د لوړو زدهکړو کیفیت لوړ کړو، ترڅو ټاکلو موخو ته ورسېږو او په علمي ډګر کې په ځان بسیا شو.
نوموړي زیاته کړه چې موږ هغه وخت کیفیت لوړولی شو، چې د زدهکړو لپاره معیاري تدریسي، زېربنایي او د نصاب اسانتیاوې برابرې او د تضمین کیفیت ټول اصول مراعات کړو.
دغه راز د لوړو زدهکړو وزارت د تضمین کیفیت او اعتبار ورکولو رئیس استاد شاکر وحیدي وویل:
چې د تضمین کیفیت معیارونو غوښتنه د تحصیلي نظام او ټولنې غوښتنه ده او اوس د دې وخت دی، چې په هېواد کې لوړې زدهکړې معیاري او کیفیت یې لوړ کړو.
په دغه ناسته کې د هغو ۱۴ امارتي او خصوصي پوهنتونونو ستاینه وشوه، چې په ۱۴۰۳ کال کې یې نوې مرحلې اخیستې وې او یا یې خپل سندونه حفظ کړي وو.
د یادونې وړ ده چې تضمین کیفیت درې مرحلې لري لومړۍ، دویمه او درېیمه مرحله، چې درېیمې ته یې بشپړ اکاډمیک اعتبار هم وایي.
